Ո՞Վ Է ՀՈՐԻՆԵԼ ՀԱՅԻՆ… ԻՍԿ ՀԱՅԱՍՏԱ՞ՆԸ
Մեր օրերում հակահայկական ինֆոլոգեմի ակտիվ շարժը հայ-ադրբեջանական պատերազմը տեղափոխել է տեղեկատվական հարթակներ և ճնշում է գործադրում բոլոր հնարավոր մեխանիզմներով: Այս առումով ադրբեջանական կողմի առաջխաղացումները պայմանավորված են.
• տնտեսաքաղաքական գործոնով. նավթարդյունաբերության ոլորտում ներդրված կապիտալը նպաստում է Ադրբեջանի ձայնը լսելի դարձնել միջազգային կառույցներում և աշխարհաքաղաքական հիմնահարցերի շահարկումներում
• հակահայկական քարոզչությունն իրականացվում է պետական մակարդակով
• Ադրբեջանի Հանրապետության ՈՒԿ-երը (ուղեղային կենտրոններ) ինստիտուցիոնալ կառույցներ են, գործում են ցանցային սկզբունքով և փոխհամաձայնեցված
• ԱՀ-ի դիվանագիտական ներկայացուցչությունները արտերկրում զբաղվում են ակտիվ քարոզչական գործունեությամբ և աջակցում տեղի հասարակական կազմակերպություններին
• քարոզչական գործունեություն որդեգրել են ադրբեջանական բոլոր ԶԼՄ-երը, որոնք քանակական և որակական հատկանիշներով գերազանցում են ՀՀ-ի ԶԼՄ-երին և ինչպես հայտարարում է ԱՀ-ի նախագահի աշխատակազմի քաղաքական վերլուծության և տեղեկատվական ապահովման բաժնի վարիչ Էլնուր Ասլանովը՝« Հայաստանի դեմ տեղեկատվական պատերազմին մասնակցում է յուրաքանչյուր ադրբեջանցի, անկախ դրանից, թե որ պետության քաղաքացի է նա, որովհետև մեզ համար դա ազգային գաղափար է, հայերի համար՝ գենետիկական անբարյացկամություն»:
ԱՀ-ի քարոզչական բազմագործառութային այս համակարգը միտված է ադրբեջանական հանրությանն ապացուցել, որ.

1.Լեռնային Ղարաբաղի հիմնախնդիրը լուծում կստանա հօգուտ Ադրբեջանի և առաջադրում են տարածքային ամբողջականության իրավական երաշխիքը՝ հղում անելով պատմական վկայություններին առ այն, որ ներկայիս Հայաստանը Արևմտյան Ադրբեջանն է: Հայերն այդ տարածք են տեղափոխվել 1828թ.-ից: Իսկ «Լեռնային Ղարաբաղը Ադրբեջանի սիրտն է»:

2.Ադրբեջանական բանակի մարտունակությունը ավելի բարձր է, քան հայկական բանակինը: Ըստ ադրբեջանական վարկածի ՀՀ-ի սոցիալ-տնտեսական ճգնաժամը քայքայել է բանակը. զինվորները սոված են և շատացել է դասալքությունը: Սա ապացուցելու համար համացանցի YouTube և RuTube որոնողական կայքերում տեղադրվում են տեսանյութեր, որոնք վարկաբեկում են ՀՀ-ի և ԼՂՀ-ի բանակը: Տեսանյութերը պարունակում են մանրամասներ.

ա) սպաների կամայականությունների
բ) քաղցած, վատ հագնված և հիվանդ զինվորների
գ) բանտային ռեժիմի
դ) գողական խմբավորումների մասին:

«Նախկին հայ զինծառայողների պաշտպանության ադրբեջանական կոմիտեն» հայ զինվորներին գերի հանձնվելու դեպքում հնարավորություն է տալիս անարգել տեղափոխվել արտասահման. «Սա հնարավորություն է ձեզ համար: Օգտվեք դրանից այսօր, քանի դեռ պատերազմը չի սկսվել: Ոչ ոք ձեզ չի պարտադրում: Պարզապես ազատ ժամանակ մտածեք ձեր սեփական ապագայի ու ձեր երեխաների ապագայի մասին: Ուզում եք, որ նրանք զոհվեն հրթիռների պայթյուններից, թե՞ ապրեն հանգիստ Եվրոպայում»:

3.Հայաստանը կաղում է սոցիալապես և տնտեսապես, ինչի հետևանքով տուժում է ռազմարդյունաբերությունը: Բացի այդ «…մենք բարձրացնում ենք մեր քաղաքացիների կենսամակարդակը, իսկ Հայաստանից ամեն շաբաթ տասնյակ ընտանիքներ են հեռանում, որոնցից ոմանք նույնիսկ անցնում են ադրբեջանական կողմ»: Ադրբեջանին քաղաքակիրթ երկրների կենսամակարդակին հասնելու համար պահանջվում է քսան տարի, իսկ Հայաստանին առնվազն հիսուն տարի:
4. Հայերը քոչվոր-եկվորներ են. նրանց նախնիները «թրակա-փռյուգիական» գաղթականներ են և տարածքային պահանջատիրական իրավասություններ չունեն: «Մենք տեղեկատվական պատերազմ ենք վարում սեփական տարածքների ազատագրման համար»,-հայտարարում է Ադրբեջանը, քանզի նրանք սերում են Մարաստանի և Ատրպատականի իրանական ցեղերից և համարվում են Կուրի ձախ ափին բնակվող ալբանացիների հետևորդները: Հայերը գրավեցին Արցախը և բարբարոսաբար ոչնչացրին ալբանական պատմական հուշարձանները: Նույնիսկ հայերին անվանում են «հայ»՝ հայերենից փոխառելով ադրբեջաներենին՝ պատճառաբանելով, որ «էրմենները» կամ «արմենները» շատ հին ցեղ են և ոչ մի կապ չունեն հայերի հետ: Եվ ընդհանրապես «…հայությունը հակաերևույթ է, որը բախվելով երևույթի հետ հանգեցնում է փոխադարձ ոչնչացման: Հայության ճիշտը սուտն է, հումանիզմը՝ մարդատյացությունը, պաշտպանությունը՝ ագրեսիա,հերոսությունը՝ ավազակություն, տրամաբանությունը՝ անհեթեթություն»:
5.Խոջալուի, Սումգայիթի և Բաքվի կոտորածները ծրագրեցին և իրագործեցին հայերը. սա հակահայ քարոզչության առանցքն է և պատմական կեղծիքի գագաթնակետը: Ադրբեջանցիների կողմից իրականացրած բռնությունները պրոյեկտելով հայերին և որակելով ցեղասպանություն՝ պետական կառույցները փորձում են ձեռք բերել միջազգային հանրության ուշադրությունը: Ըստ իրենց ներկայացրած վիճակագրական տվյալների 1988թ.-ից մինչև 1991թ.-ը զոհվել է 490 և վիրավորվել 1350 հայ, ընդ որում նրանցից 119-ը զոհվել են Սումգայիթի և Բաքվի ջարդերում: Այդ ընթացքում զոհվել է 930 ադրբեջանցի, վիրավորվել՝ 23002: Թվերի ուռճացման սովորությունը ադրբեջանցիները դրսևորում են բազմիցս՝ առանց հստակ աղբյուրների:

Ադրբեջանում հունվարի 20-ը նշվում է որպես համազգային սգո օր, փետրվարի 26-ը՝ «Խոջալուի ցեղասպանության օր», իսկ մարտի 31-ը՝ «Ադրբեջանցիների ցեղասպանության օր»: Այնպես որ «…մի օր ոչինչ չի փրկի հայ ժողովրդին միավորված մուսուլմանների վրեժխնդրությունից»:

6. Հայերը վանդալիզմի են ենթարկել Ադրբեջանի պատմամշակութային հուշարձանները և հաստատությունները. օրինակ՝ Շուշիի զավթման հետրանքով հայերը ոչնչացրին 8 թանգարան, 31 գրադարան և 8 մշակույթի տուն: Գողացվել են մոտ 1000 ադրբեջանական գորգի ցուցանմուշ, թալանվել կոմպոզիտոր ՈՒզեիր Հաջիբեկովի գրավոր հուշարձանները: Վերջինիս և բանաստեղծուհի Խուրշիդ Բանու Նաթավանի արձանները դուրս հանվեցին Շուշիից և գազանաբար գնդակոծվեցին: Օկուպացված տարածքներում քանդում են գերեզմանոցները, մզկիթները, դամբարանները, հին ալբանական հուշարձանները և իրականացնում մեծամասշտաբ, ոչ պրոֆեսիոնալ հնագիտական պեղումներ: «ԱՀ-ի մշակութային արժեքների կորստի ընդհանուր ցուցանիշը կազմում է 6մլրդ 71մլն ԱՄՆ դոլլար»:
7. Հայերը զբաղվում են գրագողությամբ. «Նրանք գողանում են ոչ միայն
ադրբեջանական երաժշտությունը, այլև ողջ մշակույթը: Դա հայկական հիվանդություն է: Մոտ 50 տարի նրանք դրանով են զբաղվում»- հայտարարում է ադրբեջանցի մշակութաբան Էլչին Այլիբեյլին:

Անի Սամսոնյան
ԻՆՖՈՐՄԱՑԻՈՆ ՊԱՏԵՐԱԶՄՆԵՐ
1388 reads | 13.02.2013
|
avatar

Մականուն:
Գաղտնաբառ:
Copyright © 2017 Diplomat.am tel.: +37491206460, +37499409028 e-mail: diplomat.am@hotmail.com