ՍԱՐԿԻՍՈՎ ԵՂԲԱՅՐՆԵՐԸ, ԽԱՉԱՏՈՒՐՈՎՆ ՈՒ ՍԱՄՎԵԼ ԿԱՐԱՊԵՏՅԱՆԸ ՌՈՒՍ ՄԻԼԻԱՐԴԱՏԵՐՆԵՐԻ ՑԱՆԿՈՒՄ ԵՆ
2013–ին Ռուսաստանում դոլարային միլիարդատերների թիվն աճել է՝ հասնելով 131–ի: Ինչպես տեղեկացնում է eMedia.am-ը՝ հղում անելով CEO ամսագրին, որը կազմել է վարկանիշային ցուցակը, մեկ տարվա ընթացքում միլիարդատերների թիվն աճել է 11–ով:2012թ–ին Ռուսաստանում բնակվում էր 120 գործարար, ովքեր ունեին միլիարդ դոլարից ավել ունեցվածք։ Ամսագրի վարկածով Ռուսաստանի ամենահարուստ մարդը՝ «Մետալոինվեստ»–ի սեփականատեր Ալիշեր Ուսմանովն է, ով ունի 18,72 մլրդ դոլար, որը, այդուհանդերձ , անցած տարվա հանդեպ կրճատվել է 8%–ով։ Հինգերորդ հորիզոնականում Միխայիլ Պրոխորովն է, ում ունեցվածքը կազմում է 15,25մլրդ դոլար, որը մեկ տարվա ընթացքում գրեթե չի փոխվել:
Հիշեցնենք, որ Պրոխորովը մասնակցել է 2012թ–ի ՌԴ նախագահի ընտրություններին: Հատկանշական է, որ Ռուսաստանի միլիարդատերների ցուցակում են նաև հայազգի գործարարները։ Մասնավորապես, 38-րդ հորիզոնականում է «Ռոսգոսստրախ» («Росгосстрах») ապահովագրական ընկերության համասեփականատեր Դանիլ Խաչատուրովը, ում ունեցվածքը կազմում է 2,89 մլրդ դոլար: Նրան հաջորդում է իր հարազատ եղբայր, գործընկեր Սերգեյ Խաչատուրովը, ում ունեցվածքը ևս 2,89 մլրդ դոլար է։ «Տաշիր» ընկերությունների խմբի սեփականատեր Սամվել Կարապետյանը 62-րդ հորիզոնականում է՝ 1,90 մլրդ դոլար ունեցվածքով: 
«Ռեսո գարանտիա» ընկերության փոխտնօրեն Նիկոլայ Սարկիսովն ու ընկերության խմբի տնօրենների խորհրդի նախագահ Սերգեյ Սարկիսովը 1,33մլրդ դոլար ունեցվածքով զբաղեցնում են 92–րդ և 93–րդ հորիզոնականը:
