«Մեր արտաքին քաղաքականությունը պետք է վերջնականապես հրաժարվի կոմպլեմենտարիզմից»

«Իրավունք»-ին տված հարցազրույցում ԳԱԱ Արևելագիտության ինստիտուտի տնօրեն, թուրքագետ Ռուբեն Սաֆրաստյանն անդրադարձել է ռուսական ռազմակայանների ժամկետների երկարացմանը և ասել. «Ես այստեղ բացասական բան չեմ տեսնում։ Իսկ ամենակարևոր դրական հանգամանքն այն է, որ Հայաստանն այս պայմանագրի շնորհիվ կարողացավ ապահովել իր անվտանգությունը մոտակա տասնամյակների ընթացքում և հնարավորություն ստացավ նաև բանակցություններ վարել ղարաբաղյան հարցի կարգավորման ուղղությամբ նորմալ պայմաններում:

…Ինչ վերաբերում է ավելի լայն առումով այս նոր զարգացումներին՝ կապված ռուսական ռազմակայանի հետ, ապա կարծում եմ՝ Հայաստանի համար ստեղծվում է շատ բարենպաստ հնարավորությունների, այսպես, շարք, կարելի է ասել` մի նոր փուլ, երբ նա կարող է իր արտաքին քաղաքականությունը կառուցել՝ հենվելով արդեն ավելի անվտանգ միջավայրի և աշխարհընկալման վրա։ Այս պայմաններում, կարծում եմ, մեր արտաքին քաղաքականությունը պետք է վերջնականապես հրաժարվի, այսպես կոչված, կոմպլեմենտարիզմից, որը, գուցեև, որոշ ժամանակ ինչ-որ իմաստ ուներ, բայց արդեն վերջին տարիների ընթացքում՝ ժամանակի առումով, նա արդեն չպետք է գործի։ Եվ հիմա Հայաստանի արտաքին քաղաքականությունը, իմ կարծիքով, պետք է լինի բազմավեկտոր, որը պետք է հիմնված լինի դաշնակցային հարաբերությունների վրա, բայց տարբեր խորությամբ»: