Երևանում մեկնարկեց նոր հեծանվահրապարակի շինարարությունը

29.07.2010

Երևանի քաղաքապետարանի և իտալական «Ռենկո» ընկերության համատեղ ներդրումային ծրագրով` մայրաքաղաքում կկառուցվի եվրոպական չափանիշներին համապատասխան նոր ու ժամանակակից հեծանվահրապարակ: Ծրագրի մեկնարկն այսօր ազդարարեցին Երևանի քաղաքապետն ու «Ռենկո» ընկերության hայաստանյան մասնաճյուղի տնօրենը: Գագիկ Բեգլարյանն ու Ֆրանչեսկո Ջուստոտտին ստորագրեցին հռչակագիր՝ սկիզբ դնելով Երևանում ժամանակակից հեծանվահրապարակի կառուցմանը: «Երևան քաղաքի համար կարևոր այս ներդրումային ծրագիրը կնպաստի Հայաստանի Հանրապետության և Իտալիայի Հանրապետության ժողովուրդների բարեկամական կապերի զարգացմանն ու ամրապնդմանը՝ ի բարօրություն հայ և իտալացի ժողովուրդների»,- այս բովանդակությամբ ուղերձով պարկուճը Երևանի քաղաքապետն ու «Ռենկո» ընկերության hայաստանյան մասնաճյուղի տնօրենը տեղադրեցին կառույցի հիմքում: Ծովակալ Իսակովի պողոտայի 27/8 հասցեում գտնվող 2 հա տարածքում կկառուցվի ավելի քան 3200 հանդիսատեսի համար նախատեսված հեծանվահրապարակ: ժամանակակից հեծանվահրապարակի շինարարությունը մարզամշակութային նոր, աշխույժ կենտրոն կդարձնի մայրաքաղաքի այս հատվածը վստահ է Երևանի քաղաքապետը: «Շատ մոտ ապագայում Երևանը կունենա միջազգային չափորոշիչներին համապատասխան հեծանվահրապարակ, ինչը կնպաստի Հայաստանում հեծանվասպորտի զարգացմանը: Այս կառույցը շատ հարմար կլինի նաև բազմաթիվ սպորտային միջոցառումների անցկացման և տարբեր սպորտաձևերի զարգացման համար: Կարող ենք նաև այլ մեծ միջոցառումներ այստեղ անցկացնել»,- նշեց Երևանի քաղաքապետ Գագիկ Բեգլարյանը: